ஜ்யோதிர் லிங்க ஸ்தலங்கள் – காசி  விச்வநாதம் – X

                                           சிவபாதசேகரன்

காசி மாநகரத்தில் உள்ள சிவாலயங்கள் (தொடர்ச்சி):

முசுகுந்தேச்வரர்  கோயில்:  காசிக் காண்டம் குறிப்பிடும் பல கோயில்களில் இதுவும் ஒன்று . கோடவ்லியா பகுதியில் ராடியோ எனப்படும் ஜைபுரியா பவன் அருகில் இக்கோயில் உள்ளது.

நள கூபேச்வரர்  கோயில்:  காஸி டோலா பகுதியில் காமேச்வரருக்குக் கிழக்கில் தனியார் வீடு ஒன்றில் இந்த லிங்க மூர்த்தியைத் தரிசிக்கலாம். நள கூபம் என்ற கிணறு இங்குள்ளது.

நிகும்பேச்வரர் கோயில்:  தவறாமல் வழிபட வேண்டிய சன்னதி இது எனக் காசிக் காண்டம் கூறும்.விச்வேச்வரர் கோயிலின் வளாகத்தில் பார்வதி கோயிலின் உட்புறம் இது உள்ளது.

பஞ்ச கங்கேச்வரர்  கோயில்: பைரோநாத் சென்று, அங்கிருந்து தைலிங்க சுவாமி மடத்தின் வெளி வளாகத்தில் இக்கோயில் இருக்கக் காணலாம். பஞ்ச கங்கா கட் வரை படகில் சென்றாலும் கோயிலை அடையலாம்.    

பவனேச்வரர் கோயில் : லோஹாட்டியா சென்று, பூத பைரவர், ஜ்யேஷ்ட கௌரி தரிசித்துவிட்டு, முஹல்லா என்ற இடத்தில் தரை மட்டத்தின் கீழ் உள்ள பவனேச்வரரைத் தரிசிக்கலாம்..

பித்ரேச்வரர் கோயில் :  பிசாச் மோசன் வழியாகச் சென்று பித்ரு குண்ட் தலப் என்ற இடத்தில் பித்ரு குண்டம் அருகில் உள்ள கோயிலைக் காணலாம். இங்கு பித்ருக்களுக்குத் தர்ப்பணம்,ச்ரார்த்தம் ஆகியவற்றைச் செய்கிறார்கள்.  

ப்ரஹ்லாதேச்வரர் கோயில்:  ப்ரகஹலாத் கட்டில் உள்ள கோயில் இது. அருகில் ஸ்வர லீநேச்வரரையும் தரிசிக்கலாம்.   

ஸமுத்ரேச்வரர் ஆலயம்: சௌக் கிலிருந்து கோடவ்வியா  செல்லும் வழியில் பன்ச்படக் விச்வநாத கல்லியின் முன்பாக அர்த்த கபரி பாபா எனப்படும் ஸமுத்ரேச்வரரையும்,ஈசானேச்வரரையும் லைன்கேச்வரரையும் தரிசிக்கலாம்.

ஷட்காலேச்வரர் கோயில்:  தாதேரி பஜார் பகுதியில் தசரத் கலா கேந்திரத்திற்கு எதிரில் பீடல் சிவாலா எனப்படும் இடத்தை அடைந்தால் தரை மட்டத்தின் கீழ் உள்ள இக்கோயிலை  அடையலாம். வழிபடுவோர் நீண்ட ஆயுளைப் பெறுவர்.

உபசாந்தேச்வரர் கோயில்: சௌக் கிலிருந்து சங்கட தேவி கோயில் வழியே சென்று படனி டோலா போசலா காட் என்ற இடத்திலுள்ள கங்கா மஹால் கட்டிடத்தின் அருகே உள்ள இக் கோயிலை அடையலாம். பத்ரேச்வரருக்கு வடகிழக்கில் உள்ளது.

வேதேச்வரர் கோயில்: ராஜ்காட் போர்டில் உள்ள ஆதிகேசவர் அருகில் நக்ஷத்ரேச்வரர், வேதேச்வரர், வருண சங்கமேச்வரர் ஆகிய மூர்த்திகளைத் தரிசிக்கலாம்.

விபண்டேச்வரர் கோயில்: பாண்டே ஹவேலிக்குச் சென்று, தில பண்டேச்வரர் கோயிலைத்  தரிசிக்கலாம். ஆண்டுதோறும் ஒரு எள் அளவு இந்த லிங்கம் வளர்வதாகக் கூறப்படுகிறது. சிவலிங்கம் பெரிது.

வித்யேச்வரர் கோயில்: சௌக் கில் ஸித்தேச்வரி என்னுமிடத்தில் (சங்கட தேவி கோயில் வழியில் ) இக்கோயில் உள்ளது.சிந்தியா காட்டைப் படகின் மூலம் அடைந்தும் செல்லலாம்.தரைக்குக் கீழ் இச்சன்னதி அமைந்துள்ளது.

விசாலாக்ஷேச்வரர்  ஆலயம்: மிர் காட்டிலுள்ள விசாலாக்ஷி கோயிலருகில் உள்ளது.விச்வநாதர், அன்னபூரணி கோயில்களையும் இத்துடன் தரிசிக்கலாம்.  

யாக்ஞவல்கீச்வரர் ஆலயம்: சௌ க்கிலிருந்து சங்கட தேவி வழியே சென்றால் , க்ருஷ்ணேச்வரருக்கு அருகே உள்ளது. 

ஆதிவராஹேச்வரர் கோயில் : காசியில் வசிப்பவர்கள் தினந்தோறும் தரிசிக்க வேண்டிய கோயில்களுள் இதுவும் ஒன்று என்று காசிகாண்டத்தில் குறிப்பிடப்படுகிறது. தசாஸ்வமேத் காட்டில் உள்ளது   

ஹரிகேசேச்வரர் ஆலயம்: அகஸ்த்யேச்வரருக்கு அருகில் உள்ளது. சோனார் புராவிலிருந்து கோடவ்வியா போகும் வழியில் ஜன்கம்பரி மடம் தாண்டி விமல ஆதித்யர் அருகில் ஒரு மேடையில் இருக்கிறது.   

காச்யபேச்வரர் சன்னதி:  மேற்கூறிய ஹரிகேசேச்வரருக்கு அருகே உள்ளது.இதுவும் தினமும் அந்தர்க்ருஹி யாத்திரை செய்ய வேண்டிய கோயில்களில் ஒன்று.

ஹட்கேச்வரர் கோயில்: இதுவும் அன்றாடம் வழிபட வேண்டிய சன்னதிகளுள் ஒன்றாகும். ஹர்ஹா சராய் சென்று, ராஜா தர்வாசாவின் உட்புறத்திலுள்ள இக்கோயிலை அடையலாம்.

ஹிரண்ய கர்பேச்வரர் கோயில்: த்ரிலோசன் காட்டில் நீராடி விட்டு , படிகளில் ஏறிச் சென்று இந்த சன்னதிக்குச் செல்லலாம்.

ஆதி மகாதேவர்  கோயில்: தேவர்களும் முனிவர்களும் சத்ய யுகத்தில் செய்த பிரார்த்தனைக்காக எழுந்தருளிய மூர்த்தி இவர். முக்தி தர வல்ல மகாதேவர். த்ரிலோசன் காட்டில் இக்கோயில் இருக்கிறது.

பால்மீகேச்வரர் கோயில்: த்ரிலோசன் காட்டில் உள்ள த்ரிலோசநேச்வரர் கோயிலுக்கு உள்ளே அமைந்துள்ளது. அக்ஷய திருதியை அன்று விசேஷ பூஜைகள் நடைபெறுகின்றன

மத்யமேச்வரர் சன்னதி: தாராநகரில் உள்ளது. பிச்வேச்வரர் கஞ்ச் என்ற இடத்திலிருந்து செல்லலாம். க்ருத்திவாசேச்வரர் கோயில் அருகில் உள்ளது.  

பார்வதேச்வரர் கோயில்: சௌக் கிலிருந்து ஆத்மவீரேச்வரர் கோயில் வழியாகச் சென்று சிந்தியா காட்டில் உள்ள இக் கோயிலை அடையலாம்.

அக்னீச்வரர் கோயில்: சௌக் கிலிருந்து  சங்கட தேவி வழியே சென்றால் , போசலா காட் என்ற இடத்திலுள்ள இக் கோயிலைத் தரிசிக்கலாம். விச்வனர்- சுஷிஷ்மதி தம்பதியரின் குமாரன் க்ரஹபதி என்பவனுக்குப் பன்னிரண்டாவது வயதில் அக்கினியால் மின்னல் வடிவில் ஆபத்து நேரும் என்று நாரதர் சொல்லக்கேட்ட  க்ரஹபதி, காசிக்குச் சென்று சிவபூஜை செய்து வந்தான். அவனது பன்னிரண்டாவது வயதில் இந்திரன் அவன் முன்னர் தோன்றி, வஜ்ராயுதத்தால் தாக்கியதால் இடி வீழ்த்ததுபோல் க்ரஹபதி மயங்கி வீழ்ந்தான். அப்போது சிவபெருமான் அவனுக்குக் காட்சியளித்து அபயமளித்தார் என்கிறது காசிக் காண்டம். அவ்வாறு அக் குமாரன் ஸ்தாபித்த லிங்கமே அக்னீச்வர லிங்கமாகும். இவரை வழிபட்டால் நெருப்பாலோ,மின்னலாலோ, அகால மரணமடையமாட்டார் என்று ஈச்வரனே வரமளித்தார் என்று புராணம் கூறுகிறது.

அச்வினி குமாரேச்வரர்  கோயில்: மேற்கண்ட போசலாகாட்டில் உள்ள மற்றொரு கோயில் இது. சூரிய குமாரர்களான அச்வினி தேவர்களால்     ஸ்தாபிக்கப்பெற்றது.

பாகீரதேச்வரர் கோயில்: மணிகர்ணிகா கட்டத்திலிருந்தோ அல்லது சௌக்கிலிருந்து பிராமணாள் வழியாகவோ சென்றால்  தேவானந்த் சதுர்வேதி என்பவரது வீட்டிற்குள் இக் கோயிலை அடையலாம்.

சண்டீச்வரர் கோயில்: ஸதர் பஜாரில் பீஷ்ம சண்டீ தேவி கோயில் அருகிலுள்ளது.காசியில் உள்ள ஆற்றல் மிக்க பதினான்கு லிங்கங்களில் இதுவும் ஒன்று என சிவபெருமானே கூறியதாகக் காசிக் காண்டம் கூறுகிறது.

சித்திரங்கதேச்வரர் கோயில் :கேதார்காட் தபால் நிலையம் அருகில் உள்ளது.  

தண்டபாணி  : சௌக் பக்கத்திலுள்ள ஞானவாபியின்  அருகிலுள்ளது.    விச்வநாதருக்குத் தெற்கில், தண்டத்தை ஏந்தியவராகத்  தீய சக்திகளை அண்டவிடாமல் செய்யும் பணியை மேற்கொண்ட இவரை அவசியம் வழிபடவேண்டும் என்று பரமேச்வரனே சொல்வதாகக் காசி காண்டம் கூறுகிறது. பூர்ணபத்ரன் – கனக குண்டலை  தம்பதியரின் குமாரனான ஹரிகேஷ் என்பவன் இளமையிலேயே ஆன்மீக நாட்டம் கொண்டம் கொண்டு காசிக்குச் சென்று தவம் இயற்றினான். அவனுக்குக்  காசியைக் காவல் காக்கும் பணியை அளித்தருளினார் இறைவன். அப்போது  அருளிய  விச்வேசர், ஹரிகேஷை வழிபடாதவர்கள் முக்தி அடைய மாட்டார்கள் என்று சொன்னதாகக் காசிக் காண்டத்தால் அறிகிறோம்.  

 

த்ருவேச்வரர்  கோயில்: துருவனது தவத்திற்கு மெச்சிய மஹாவிஷ்ணு , அவனுக்குக் காட்சியளித்து, அவனைத் தன்னுடன் காசிக்கு அழைத்துச் சென்றார். அவரது சொற்படி, துருவன் பிரதிஷ்டை செய்த மூர்த்தியே த்ருவேச்வரர் ஆவார்.நயி சரக் என்ற இடத்தில், ஸநாதன தர்ம கல்லூரியில் இக்கோயில் உள்ளது.   

கருடேச்வரர் கோயில்: ஜங்கம்பாடியில் உள்ள கோயில். கருடன் தனது தாயான வினதையுடன் காசிக்குச் சென்று இங்கு சிவலிங்கப் பிரதிஷ்டை செய்ததாகக் காசிக் காண்டம் கூறும்.

ஞானேச்வரர் கோயில்: காசிக் காண்டத்தில் குறிப்பிடப்பெறும் பதினான்கு முக்கியமான சிவலிங்கங்களுள்  ஒன்றான இந்த மூர்த்தியின் கோயிலை லாஹேரி தோலா என்ற இடத்தில் ஞானேச்வர் சில்க் பாக்டரி வளாகத்தில் காணலாம்.

ஹரிசந்த்ரேச்வரர் கோயில்: பெரிய லிங்க மூர்த்தியான இவரைத் தனியார் ஒருவரது வீட்டில் ஸங்கட் காட் என்ற இடத்தில் வழிபடலாம்.          சௌக்கிலி ருந்து ஸங்கட தேவி கோயில் வழியாகச் செல்லலாம்.  

ஜய் கிஷேச்வரர் கோயில்:  பூத் பைரவ்  என்ற இடத்தில் அக்னி த்ருவேச்வரர் கோயில் செல்லும் வழியில் உள்ளது.ஜயகீஷ் முனிவர் தவம் செய்த குகை இங்கு உள்ளது.   

ஜ்யேஷ்டேச்வரர் கோயில்: ஜ்யேஷ்ட மாத பௌர்ணமிக்கு முன் வரும் சுக்ல சதுர்தசி மற்றும் அனுஷ நக்ஷத்ரம் சேர்ந்த சோமவாரம் ஆகிய தினங்களில் இங்கு வழிபடுதல் விசேஷ பலன்களைத் தரும். மைதாகின் என்ற இடத்திலிருந்து ஸப்த ஸாகர் முஹல்லா என்ற இடத்திற்குச் சென்றால் காசி தேவி கோயிலுக்கருகிலுள்ள இந்தக் கோயிலை அடையலாம்.  

தூர்வாசேச்வரர்/காமேச்வரர்  கோயில்: காசியையும் அங்கு வாசம் செய்வோரையும் துர்வாச முனிவர் சபிக்க இருக்கையில், சிவபெருமான் அவர் முன் காட்சியளிக்கவே,முனிவரின் கோபம் தணிந்தது. காம குண்டத்தை உண்டாக்கி,காமேச்வர லிங்கப் பிரதிஷ்டை செய்தார்.இங்கு சனிப் பிரதோஷத்தன்று தரிசிப்பதால் பாவங்கள் நீங்கப் பெறலாம். இங்குள்ள பெரிய லிங்கம் துர்வாசேச்வரர் என்றும் சிறிய லிங்கம் காமேச்வரர் என்றும் அழைக்கப்படுகிறது.  

கந்தூகேச்வரர் கோயில்: ஒரு முறை பார்வதி தேவியானவள் பந்து விளையாடிக்கொண்டு இருந்தபோது, ராக்ஷசர்கள் அங்கு வரவே, அன்னை அப்பந்தை அவர்கள் மீது எறிந்து அவர்களை சம்ஹரித்தாள். அப்பந்து மீண்டு வந்து ஒரு சிவலிங்கமாயிற்று. அம்மூர்த்தியைப்பார்வதி தேவி தினமும் வழிபடுகிறாள். காசி தேவி கோயில் வழியாகச் சென்றால் பூத பைரவ் என்ற இடத்தில் இக்கோயில் இருப்பதைக் காணலாம்.  

கபர்தீச்வரர் கோயில்: பாவச் செயல்கள் காரணமாகப் பிசாசு உருவம் கொண்ட ஒருவரை , சிவசஹஸ்ரநாமம் சொல்லிக் கொண்டிருந்த வான்மீகி முனிவர்,  விமல குண்டத்தில் ஸ்நானம் செய்து, கபர்தி என்ற சிவகணம் பிரதிஷ்டை செய்த கபர்தீஸ்வரரைத் தரிசிக்குமாறு கூறினார். அப்படியே செய்ததால் பிசாசு வடிவம் நீங்கியது. விபூதியின் மகிமையைக் கூறிய முனிவர், அப்பிசாசு வடிவம் நீங்கப்பெற்றவனுக்கு அதனைப் பிரசாதமாக அளித்தருளினார் என்று காசிக் காண்டம் கூறுகிறது. பிசாச் மோசனில் இக்கோயில் உள்ளது. பிசாச் மோசன் குண்டில் பித்ரு காரியங்கள் செய்யலாம்.

கார்க்கோடக நாகேச்வரர் கோயில்: ஜெயத்புரா காவல் நிலையம் வரை சென்று அங்கிருந்து நாக் கௌனுக்குச் சென்றால் கார்க்கோடக வாபியில் உள்ள கார்க்கோடக லிங்கத்தைத் தரிசிக்கலாம். அருகில் கந்தர்வேச்வரர் எழுந்தருளியுள்ளார்.ஸ்ரவண மாத நாக பஞ்சமியில் பக்தர்கள் வருகை அதிகமாக இருக்கும். சர்ப்பதோஷ நிவர்த்தி பெற பூஜைகள் செய்கிறார்கள்.

குபேரேச்வரர் கோயில்: அன்னபூரணி கோயிலின் உட்புறம் உள்ள இந்த லிங்கப் பெருமான்,குபேரனால் பிரதிஷ்டை செய்யப்பட்டது.அவன்  முற்பிறவியில் தவறு பல செய்திருந்தும் நல்வினைப் பயனால் காசியில் உள்ள சிவாலயத்தில் நிகழ்ந்த மகா சிவராத்திரி பூஜையைக் கண் விழித்து தரிசித்ததாலும், அறியாமலேயே தீபம் ஏற்றியதாலும் சிவனருளால்  குபேரனாக்கப்பட்டான்.

மார்க்கண்டேச்வரர் கோயில்: ஞான வாபி அருகில் உள்ளது. மார்க்கண்டேய தீர்த்தம் தற்சமயம் காணப்படவில்லை.

நர்மதேச்வரர் கோயில்: ஒருசமயம், கங்கைக்கு சமமாகத் தானும் எண்ணப்படவேண்டும் என்று நர்மதையானவள் பிப்பில தீர்த்தமருகிலுள்ள த்ரிலோசநேச்வரருக்கு அருகில் லிங்கத்தைப் பிரதிஷ்டை செய்து தவம் செய்தாள். அவளது தவத்திற்கு இரங்கிய சிவபெருமான், “ நர்மதை நதியில் உள்ள கற்கள் அனைத்தும்              சிவலிங்கங்களாகவே எண்ணப்படும்.நர்மதையைப் பார்த்தவுடனேயே பாவங்கள் அகன்றுவிடும் . இந்த லிங்கத்தில் நான் நர்மதேச்வரர் என்ற பெயரில் இருக்கிறேன் . இந்த லிங்கத்தைப் பார்த்தாலே பாவங்கள் நீங்கி விடும் “ என்று வரமளித்து அருளினார்.  

பிரஹலாத் காட் சௌலாஹா சென்று அங்கிருந்து த்ரிலோசனை அடைந்தால் இக் கோயிலைத் தரிசனம் செய்யலாம்.   

பஞ்ச குரோசேச்வரர் கோயில்: சௌக் கிலிருந்து காஷ்மீரி மால் ஹவேலி என்ற இடத்திற்குச் சென்றால் இக் கோயிலை அடையலாம்.ஐந்து நாட்களில் 128 மூர்த்திகளைப் பக்தர்கள் காசியை வலமாகச் சென்று  தரிசிப்பது  பஞ்ச க்ரோச யாத்திரையாகும்.அந்தப்பலனை இக் கோயிலைத் தரிசிப்பதால் பெறலாம் என்கின்றனர்.காசி காண்டத்தில் சிவலிங்க யாத்திரை,ஏகாதச லிங்க யாத்திரை, அந்தர்க்ருஹி யாத்திரை, கௌரி யாத்திரை, சூர்ய யாத்திரை, பைரவ யாத்திரை, விஷ்ணு யாத்திரை ஆகியவற்றைக் கூறியுள்ளது போல், கூர்ம புராணம்,சிவ ரஹஸ்யம் ஆகியவற்றில் பஞ்ச க்ரோச யாத்திரை பற்றிக் கூறப்பட்டுள்ளது.

பார்வதீச்வரர் கோயில்:  காசியில் லிங்க ஸ்தாபனம் செய்பவர்கள் எல்லையற்ற ஆனந்தம் பெறுவர் என்று சிவபெருமான் சொல்லக் கேட்ட பார்வதியானவள் தானும் ஓர் லிங்கத்தை அங்கு பிரதிஷ்டை செய்து வழிபட்டாள் . அதுவே பார்வதீச்வர லிங்கமாகும். மச்சோதரியைத் தாண்டி ஆதி மகாதேவ்- த்ரிலோசன் என்ற இடத்தில் இக் கோயில் உள்ளது.

பசுபதேச்வரர் கோயில்: மணிகர்ணிகாவுக்கு வடபுறம் பசுபதேச்வரர் கல்லி என்ற இடத்தில்  பசுபதி தீர்த்தமும் அதனருகில் பெரிய ஸ்வயம்பு லிங்க வடிவில் பசுபதேச்வரரும் இருக்கக் காணலாம். மாலையில் இவரை வழிபடல் சிறப்பு என்று காசிக் காண்டம் குறிப்பிடும்.சித்திரையில் சுக்ல சதுர்தசியன்று சிறப்பு வழிபாடுகள் நடைபெறுகின்றன.   

பிதாமஹேச்வரர் கோயில்: சௌக் கிலிருந்து நடந்து, சீதலா கல்லி என்ற இடத்தை அடைந்தால் தரைமட்டத்திலிருந்து ஆழத்தில் அமைந்துள்ள ஸ்வயம்பு மூர்த்தியின் சன்னதியைத் தரிசிக்கலாம்.மிகுந்த சக்தி வாய்ந்த சன்னதியாக இது கருதப்படுகிறது.

ரத்னேச்வரர் கோயில்: தங்களது மகளான பார்வதியைக் காண்பதற்காக ஹிமவானும் மேனியும் ஆடை, நவரத்னங்கள் ஆகிவற்றை எடுத்துச் சென்றனர். காசியில் தங்களது மகள் வசிப்பதோ முத்தும் வயிரமும் பதித்த அரண்மனை என்று அறிந்து, வெட்கியவர்களாகத் தாம்  கொண்டுவந்த ரத்தினங்களை ஓரிடத்தில் வைத்துவிட்டு மறுநாள் விடியற்காலையில் காசியிலிருந்து கிளம்பி  விட்டார்கள். அந்த ரத்னக் குவியல் ஒரு சிவலிங்கமாக ஆகிவிட்டது. அதுவே ரத்நேச்வரர் எனப்படுவதாகும். இவரைப் பூஜித்தால் ஒரு கோடி ருத்ர ஜபம் செய்த பலன் கிட்டும் என்று காசிக் காண்டம் புகழ்கிறது. இக் கோயிலானது, பிசேச்வர் கஞ்ச் தபால் நிலயம் அருகில் வ்ருத்தகாலேச்வரர், ம்ருத்யுஞ்ஜேச்வரர் கோயில்களுக்குச் செல்லும் வழியில் உள்ளது

ஸ்ருதீச்வரர் கோயில் : மேற்படி ரத்நேச்வரர் கோயில் அருகில் உள்ளது.  

சைலேச்வரர் கோயில்: வருண நதிக்கரையில் ஹிமவான் ஒரே இரவில் எழுப்பிய கோயில் இது.சைலபுத்ரி என்ற இடத்தில் மர்ஹியா காட் என்ற பகுதியில் இருக்கிறது.  

ஸித்தி அஷ்டகேச்வரர் ஆலயம்: லோஹாட்டியா சென்று அங்கிருந்து, பாரா கணேஷ் கோயில் வளாகம் சென்றால் ஆலயத்தை அடையலாம். மந்தாகினி தீர்த்தத்தின் வடக்கே உள்ளது. வழிபட்டால் அஷ்ட ஸித்திகள் பெறலாம்.

த்ரிலோசனேச்வரர் கோயில்: பிப்பில தீர்த்தத்தில் நீராடி, ஸ்வயம்பு லிங்கமான த்ரிலோசநேச்வரரைத் தரிசித்தவுடனே எல்லாப் பாவங்களும் நீங்குவதாகக் காசிக் காண்டம் கூறுகிறது.இது த்ரிலோசன் காட் என்ற பகுதியில் மச்சோதரிக்கு அருகில் உள்ளது.வாரணசி தேவியும் இங்கு கோயில் கொண்டுள்ளாள்.அக்ஷய திரிதியை இங்கு விசேஷம்.

த்ரிஸந்த்யேச்வரர் கோயில்: பூத் கணேஷ் என்ற இடத்தில் உள்ள இம்மூர்த்தியை த்ரிசந்த்யா தீர்த்தத்தில் நீராடி, சந்த்யா வந்தனம் செய்து வழிபடல் வேண்டும். தீர்த்தத்தில் நீர் வற்றினால் அருகிலுள்ள கங்கையில் நீராடுகிறார்கள்.  

வருணேச்வரர்  கோயில்: கர்தம ரிஷியின் குமாரன் சுசிஷ்மன் என்பவன் நீர் வாழ் பிராணியால் இழுத்துச் செல்லப்பட்டு, சிவனருளால் காப்பற்றப்படவே, உயிர் பிழைத்த சுசிஷ்மன், காசியில் சிவலிங்கப் பிரதிஷ்டை செய்தான். அவன் வேண்டியபடியே சிவபிரானும் அவனை நீரில் வாழும் உயிர்களுக்குத் தலைவனாக்கினார். சௌக் கிலிருந்து கோமத் என்ற பகுதிக்கு நடந்து சென்றால் ஜ்யோதி ரூபேச்வர்( அபய சன்யாஸ ஆச்ரமம் ) என்ற இடத்தில் வருணேச்வர லிங்கத்தைத்  தரிசிக்கலாம்.

வாசுகீச்வரர் கோயில்: சிந்தியா காட்டில் ப்ரஹஸ்பதீச்வரர் கோயிலருகே ஜ்யேஷ்டேச்வர லிங்கத்தின் தென்புறம் வாஸுகீச்வர லிங்கம் உள்ளது. அருகில் ஆத்ம வீரேச்வரர் கோயில் இருக்கிறது. வாஸுகி தீர்த்தத்தில் நீராடி, வாசுகீச்வரரை வழிபட்டுத் தானங்கள் அளிப்பது சிறப்பு. தற்போது அக்குண்டம் நிலத்திற்கு அடியில் உள்ளது என்கின்றனர். சர்ப்ப தோஷ நிவர்த்தி பெற வேண்டிப் பலர் இங்கு வருகிறார்கள்.

விச்வகர்மேச்வரர் கோயில்: சிந்தியா காட் பகுதியில் ஆத்ம வீரேச்வரர் கோயிலின் உட்புறம் விச்வகர்மாவால் ஸ்தாபிக்கப்பட்ட சிவலிங்க தரிசனம் பெறலாம்.  

வ்யாக்ரேச்வரர் கோயில்: துந்துபி என்பவன் அந்தணர்களைக் கொன்று கொண்டிருந்தபோது ஒரு சிவராத்திரி தினத்தன்று பூஜை செய்து கொண்டிருந்த ஓர் அந்தணரைப் புலி வடிவம் கொண்டு தாக்கினான். அப்போது சிவலிங்கத்திலிருந்து வெளிப்பட்ட இறைவன் அவனைக் கொன்று ,பக்தனைக் காப்பாற்றினார். பூத் பைரவ் மொஹல்லா என்ற இடத்தில் இந்தக் கோயில் உள்ளது .

                 ( காசியின் தெய்வ தரிசனங்கள்  தொடரும் )      

ஜ்யோதிர் லிங்க ஸ்தலங்கள் – காசி விச்வநாதம் – IX

 

ஜ்யோதிர் லிங்க ஸ்தலங்கள் – காசி  விச்வநாதம் – IX

                                           சிவபாதசேகரன்

காசி மாநகரத்தில் உள்ள சிவாலயங்கள் (தொடர்ச்சி):

                                                                பைரவர் : நன்றி:வலைத்தளப் படம் 
அகஸ்த்யேச்வரர் கோயில்: மேரு மலை உயர்ந்திருப்பதைக் கண்ட விந்தியமலை தானும் அவ்வண்ணம் உயர ஆரம்பிக்கவே, அஞ்சிய தேவர்கள் , பிரமனுடன் காசிக்குச் சென்று அகஸ்திய ரிஷியிடம் முறையிட்டனர். அப்போது அகஸ்திய முனிவர், சிவலிங்கம் ஒன்றையும் அகஸ்திய குண்டத்தையும்  பிரதிஷ்டை செய்து வழிபட்டு, அமரர்களின் கவலையைப் போக்கியதாகக் காசிக் காண்டம் கூறுகிறது. இக்குண்டத்தில் நீராடி, பித்ரு காரியங்களைச் செய்தால் காசியில் வசித்த பலன் உண்டு என்று அதில் கூறப்படுகிறது. நாட்டுக் கோட்டை நகரத்தார் சத்திரத்திற்கு அருகில் அகஸ்த் குண்ட் என்ற இடத்தில் இக்கோயில் உள்ளது.

அங்கீரசேச்வரர் கோயில்:   ஜங்கம்பரி மடத்து வளாகத்துள் இக்கோயில் உள்ளது. அங்கீரஸ முனிவரால் பிரதிஷ்டை செய்யப்பட்டது.

புலஹேச்வரர் & புலஸ்தீச்வரர் கோயில்கள்:  சௌக்  என்ற இடத்தில்  மணிகர்ணிகா கட்டம் செல்லும் வழியில் ஸ்வர்கத்வார் / பிராமணாள் சௌராஹா என்ற இடத்தில் புலஹர் மற்றும் புலஸ்திய மகரிஷிகளால் பிரதிஷ்டை செய்யப்பட்ட மூர்த்திகள் ஒரே வளாகத்திற்குள் இவ்விரண்டு சன்னதிகளில் அமைந்துள்ளன. அருகில் ஒரு சலவைக்கல் நடைமேடை உள்ளது.

வசிஷ்டேச்வரர் கோயில்: வருண சங்கமத்திற்கு அருகில் உள்ள கோயிலும் சௌக்கிலிருந்து ஸங்கட் காட் என்ற இடத்திற்கு ஸங்கட தேவி கோயில் வழியே சென்றால் அதன் அருகிலுள்ள   உள்ள கோயிலும் வசிஷ்டர் பிரதிஷ்டை செய்தவைகளாகக் கருதப்படுகின்றன. காசியில் வசிப்போர் தினமும் வழிபடவேண்டிய கோயில்களுள் வசிஷ்டேச்வர் கோயிலையும் வாமதேவேச்வரர் கோயிலையும் குறிப்பிடுவர்.  

வாமதேவேச்வரர் கோயில் : வாமதேவர் வழிபட்ட லிங்க மூர்த்தியின் கோயில் மேற்கண்ட சங்கட் காட் என்ற இடத்தில் உள்ளது.

வ்யாசேச்வரர் கோயில் :  காசி விச்வநாதர் சன்னதியில் நின்று கொண்டு,தனது கைகளைத் தூக்கியபடி விஷ்ணுவே முழுமுதற்கடவுள் என்று வியாஸ மகரிஷி சொன்னவுடன் அங்கிருந்த நந்திதேவரது சாபத்தால் அவரது உயரத் தூக்கிய கைகள் செயலற்றதோடு பேசும் தன்மையையும் இழந்தார். விஷ்ணுவின் வழிகாட்டுதல் படி வியாசர் பேசும் திறன் பெற்றார். கைகளும் பழையபடி ஆயின. தனது பிழைக்கு வருந்திய வியாஸ முனிவர், சிவபிரானைத் துதித்தார். தனது பெயரில் ஒரு லிங்கத்தையும் ஸ்தாபித்தார். கர்ண கண்ட புஷ்கரணியில் உள்ள வ்யாசேச்வர லிங்கம் மழைக் காலத்தில் நீருக்குள் மூழ்கி விடுகிறது.

பாரபூதேச்வரர் கோயில்:  பாரபூத் என்னும் சிவகணத்தால் பிரதிஷ்டை செய்யப்பட்ட இம்மூர்த்தியைத் தரிசிக்க, சௌக்கிலிருந்து நீசி பாக் செல்லும் வழியில்  ராஜா தர்வாசா சென்றால் இக்கோயிலை அடையலாம்.  இந்த மூர்த்தியைத் தரிசிக்காதவர்கள், காய்க்காத மரம் போல பூமிக்குப் பாரமாக இருப்பார்கள் என்று காசி காண்டம் கூறும். 

கிராதேச்வரர் ஆலயம்: மேற்கூறிய பாரபூதேச்வரர் கோயிலுக்குப் பின்புறம் உள்ள அத்தர் விற்பனைக்கடைக்கு எதிரில் உள்ள வளாகத்தில் தரை மட்டத்திற்குக் கீழ் கிராதன் என்ற சிவகணம் ஸ்தாபித்த கிராதீச்வர மூர்த்தியைத் தரிசிப்பதால் மறு பிறவி இல்லை என்று காசி காண்டம் மூலம் அறியலாம்.

க்ஷேமேச்வரர் கோயில்:  க்ஷேமக் என்ற சிவகணம் ஸ்தாபித்த லிங்க மூர்த்தி, க்ஷேமேச்வரர் என்ற பெயருடன் காட்சியளிக்கும் கோயிலுக்குச் செல்பவர்கள்,கேதார் கட்டத்திலுள்ள க்ஷேமேச்வரர் காட் என்ற இடத்தை அடைந்தால் கோயிலை  அடையலாம்.

குக்குடேச்வரர் கோயில்: துர்கா குண்டம் என்ற இடத்திலுள்ள குக்குடேச் வரர் கோயிலில் உள்ள லிங்க மூர்த்தி, குக்குடன் என்ற சிவகணத்தால் ஸ்தாபிக்கப் பெற்றதாகும்.

லங்லீச்வரர் கோயில்: லங்லீ  என்ற சிவ கணம் ஸ்தாபித்தது. இவரை வழிபடுவோர் உடல் ஆரோக்கியத்துடன் இருப்பர் என்று காசி காண்டம் கூறுகிறது. சௌக்கிலிருந்து கத்ரி  மெடிக்கல் ஹால் வழியே செப்ரால் கோவா கல்லி சௌராஹா என்ற இடத்தில் இக்கோயில் உள்ளது. இங்கு தானம் அளிப்பது சிறப்பு.

பஞ்சாக்ஷேச்வரர் கோயில்: த்ரிலோசன் காட்டில் அமைந்துள்ள  த்ரிலோசநேச்வரர் கோயிலுக்கு அருகில் ருத்ராக்ஷேச்வரரைத் தரிசிக்கலாம். 

பிங்கலேச்வரர் கோயில்: பிசாச் மோச்சன் பகுதியில் கபர்தீச்வரருக்கு அருகில் உள்ள இந்த சிவலிங்கத்தைப் பிங்களன் என்ற சிவகணம் ஸ்தாபித்தது.

திலபர்ணேச்வரர் ஆலயம்: திலபர்ணன் என்ற சிவகணத்தால் ஸ்தாபிக்கப் பெற்றது. துர்க்கா குண்ட் என்ற இடத்திலுள்ள துர்க்கை ஆலயத்தருகில் உள்ளது.  

அமரேச்வரர் ஆலயம்: லோலார்க் குண்ட் க்குப் பின்புறம் அஸிக்கு அருகில் உள்ளது. இவரை வழிபடுவோர்க்கு அகால மரணம் இல்லை.

பூர் புவ ஸுவ லிங்கம்: கந்தமாதனத்திலிருந்து நந்திதேவரால் எடுத்துவரப்பெற்று பிரதிஷ்டை செய்யப்பட்டது. பூத் பைரவ் அருகில் உள்ளது. பெரிய சிவலிங்க மூர்த்தி.

ஈசாநேச்வரர் ஆலயம்: ஈசானபுரியிலிருந்து காசிக்கு வந்த பதினொரு சிவ பக்தர்களால் ஸ்தாபிக்கப்பட்டது. சதுர்தசியில் வழிபட்டால் மோக்ஷம் கிட்டும். பன்ஸ்படக் என்ற இடத்திலுள்ள ஒரு ஷாப்பிங் மாலுக்குள் உள்ளது.  

ஹரேச்வரர் கோயில்: நந்தி தேவர் ஹரிச்சந்திர க்ஷேத்ரத்திலிருந்து கொண்டு வந்து பிரதிஷ்டை செய்தது. ராஜ்காட் போர்ட் என்ற  இடத்தில் உள்ளது.

ஜடீச்வரர் கோயில்: பாடலீச்வரர் என்றும் அழைக்கப்படும் ஜடீச்வரரை  பெங்காலி தோலாவிலுள்ள ஒரு வீட்டின் வெளியில் காணலாம். ராமேச்வரத்திலிருந்து வந்ததாகக் கூறப்படுகிறது. அருகில் ஏகதந்த விநாயகர் உள்ளார்.

ருத்ரேச்வரர் சன்னதி:   இவரை வழிபடுவதால் ஒரு கோடி ருத்ர மூர்த்திகளை வழிபட்ட பலன் கிடைக்கும்  ருத்ர மஹாலயம் என்ற இடத்திலிருந்து எழுந்தருளப்பெற்றவர் . திரிபுரா தேவி கோயிலுக்கு அருகிலுள்ள ஒரு வீட்டிற்குள் இருக்கும் கோடீச்வர லிங்கம் மிகப் பெரியது.சத்ர்தசியும் திருவாதிரையும் இனைந்து வரும் நாளில் இவரை வழிபடுவது மிகுந்த பலனை அளிப்பதாகக் காசிக் காண்டம் கூறுகிறது.

த்ரிபுரேச்வரர் கோயில்: மேற்கண்ட ருத்ரேச்வரருக்கு அருகில் உள்ளது. மிர் காட் என்ற இடத்தில் திரிபுரா பைரவி தேவி சன்னதிக்கு அருகில் உள்ளது.

ஸஹஸ்ராக்ஷேச்வரர் கோயில்: ஸ்வர்ண தீர்த்தத்திலிருந்து காசிக்கு எழுந்தருளிய இவரை வழிபட்டால் நூறாயிரம் ஆண்டுகளில் செய்த பாவங்கள் நீங்குவதாகக் காசிக் காண்டம் கூறுகிறது. சைலபுத்ரி என்ற இடத்தில் உள்ளது.

சூல் டங்கேச்வரர் கோயில்: தசாச்வமேத கட்டில் படா லிங்கம் என்று இக்கோயில் பிரசித்தமாக விளங்குகிறது. வேகமாகப் பாய்ந்து வரும் கங்கையை, சிவபெருமான் , தனது சூலத்தை நிறுத்தித் தடுத்ததாகப் புராண வரலாறு கூறுகிறது.

சூக்ஷ்மேச்வரர் கோயில்: தூப் சண்டி பகுதியில் தூமாவதி கோயிலில் உள்ள விகடத்வஜ விநாயகருக்கு அருகிலுள்ளது.வரமனைத்தும் தரும் இந்தப் பெருமான் ஆம்ரதகேச்வர க்ஷேத்திரத்திலிருந்து காசிக்கு எழுந்தருளப்பெற்றவர்.

விமலேச்வரர் கோயில்: நீல் கண்ட் மகோதியோ என்று அழைக்கப்படும் இவரைத் தரிசிக்க, நயா மகோதியோ- ப்ரஹலாத் காட் என்ற இடத்திற்குச் செல்ல வேண்டும். அருகில் ஸ்வர லீனேச்வரரையும் தரிசிக்கலாம்.

வ்ருஷேச்வரர் கோயில்: கேதார்நாத் மைதாகின் என்ற இடத்தில் உள்ளது இக்கோயில். வ்ருஷபத்வஜ தீர்த்தத்திலிருந்து தோன்றிய மூர்த்தி இவர். 

அமிர்தேச்வரர் கோயில் : காசியில் வாழ்ந்த சனரு என்ற முனிவரின் குமாரன் உபஜன்கினி என்பவன் பாம்பு கடித்ததால் இறக்கவே, அவனது உடலை இடுகாட்டில் இட்டு அந்திம சம்ஸ்காரங்களை முனிவர் செய்யத் துவங்கும் வேளையில் அக்குமாரன் உயிர் பெற்று எழுந்தான். அவனைக் கிடத்திய இடத்தின் கீழ் சிறியதொரு லிங்கம் இருப்பதைக் கண்ட முனிவர் அதற்கு இறந்தவரை மீண்டும் உயிர்ப்பிக்கும் சக்தி இருப்பதைக் கண்டு வியந்து அந்த லிங்க மூர்த்தியைப் பிரதிஷ்டை செய்தார். அமிர்தேச்வரரை  வழிபட்டால் பிறவிப் பிணியிலிருந்து நீங்கலாம். இந்த லிங்க மூர்த்தியின் பெருமையை அம்பிகைக்குப் பரமசிவனே கூறியதாகக் காசிக் காண்டம் உரைக்கிறது. சௌக் என்ற இடத்திலிருந்து நடந்தால், நீல்கண்ட் பச்சா மஹராஜ் கங்கா புத்ர ஹவுஸ் என்ற இடத்தில் இக்கோயில் இருக்கிறது. வழியில் நீலகண்டேச்வரர் மற்றும் காளி கோயில்களைக் காணலாம். இதன் அருகில் கர்நாடக மாநிலத்தைச் சேர்ந்த ஆதி சுஞ்சனகிரி சமஸ்தான மடம் இருப்பதைப் பார்க்கலாம்.

ஜ்யோதி ரூபேச்வரர் கோயில் : மஹா விஷ்ணுவுக்கு ஜோதி ரூபமாகக் காட்சியளித்த லிங்கப்பெருமானை மணிகர்ணிகைக்கு அருகில் தரிசனம் செய்யலாம். கோமத் என்ற இடத்திலுள்ள அபய சன்யாஸ ஆசிரம வளாகத்தில் இக்கோயில் உள்ளது.

கருணேச்வரர் கோயில்: தசாஸ்வமேத் விச்வநாத் கல்லியில் சென்று லஹோரி டோலா –பூத கணேஷ் என்ற இடத்தில் மோக்ஷ த்வாரேச்வரர் கோயிலுக்கு அருகில் ஒரு வீட்டிற்குள் இக்கோயிலை அடையலாம்.  

மோக்ஷ த்வாரேச்வரர் கோயில்: மேற்கூறிய கருணேச்வரருக்கு அருகில் வீட்டிற்குள் உள்ளது.

ஸ்வர்க த்வாரேச்வரர் கோயில்: காசிக் காண்டத்தில் குறிப்பிடப்பெறும் இந்த மூர்த்தியின் கோயிலை ப்ராஹ்மணாள் என்ற இடத்தில் புலஹேச்வரருக்கு எதிரில் இருக்கக் காணலாம்.

கூஷ்மாண்டேச்வரர் கோயில்: மேற்குறிப்பிட்ட ஸ்வர்க த்வாரேச்வரர் அருகில் கூஷ்மாண்டேச்வரரை வழிபடலாம்.

ஆபஸ்தம்பேச்வரர் கோயில்:  பிஷேஷ்வர் கஞ்ஜ்  வழியாகத் தாரா நகரை அடைந்தால் மத்யமேச்வரருக்கு அருகாமையில் இந்த லிங்க மூர்த்தியைத் தரிசனம் செய்யலாம்.  

ஆஷாடேச்வரர் கோயில்: லோஹாடியா வழியாகவோ ஜ்யேஷ்ட கௌரி வழியாகவோ சென்று காசிபுரா என்ற இடத்தை அடைந்தால் இக்கோயில் இருக்கக் காணலாம்.

அவதூதேச்வரர் கோயில்: சௌக்கிற்கு அருகில் பசுபதேச்வரர் கோயிலுக்கு எதிரில் உள்ளது.

பத்ரேச்வரர் கோயில்: சௌக்கிலிருந்து சங்கட தேவி கோயில் வழியாகப்  போசலா காட்டில் படனிடோலா என்னுமிடத்தில் உள்ளது. இங்குள்ள பத்ர ஹ்ருத தீர்த்தத்தில் நீராடி, கோதானம் செய்வது மிக்க புண்ணியத்தை அளிக்கும். பூரட்டாதி நக்ஷத்திரமும் பௌர்ணமியும் சேர்ந்த நாளன்று இங்கு தரிசிப்பது விசேஷமானது.

பூதேச்வரர் கோயில்: தசாஸ்வமேத் பகுதியிலிருந்து பூதேச்வர் கல்லியை அடைந்தால் இக்கோயிலைத் தரிசிக்கலாம்.

சக்ரேச்வரர் கோயில்: அன்னபூர்ணா கோயிலில் உள்ளது. இங்குள்ள சக்ர தீர்த்தத்தையும், சக்ரம் பொறித்த லிங்கத்தையும் பற்றிக் காசிக்  காண்டம் குறிப்பிடுகிறது.

சதுர்முகேச்வரர் கோயில்: ராஜ்காட் போர்ட்டில் உள்ள ஆதி கேசவர் கோயிலுக்கு அருகில் வருண சங்கமேச்வரருக்கு முன்பு இந்த சதுர்முகப்  ப்ரயாக லிங்கம் உள்ளது. சதுர்முகப்  பிரமனால் ஸ்தாபிக்கப்பட்டது.

தக்ஷேச்வரர் கோயில்: பிஷேஷ்வர் கஞ்ஜ்  வழியாக வ்ருத்தகாலை அடைந்து ம்ருத்யுஞ்ஜேச்வரருக்கு அருகிலுள்ள தக்ஷேச்வரரைத்  தரிசனம் செய்யலாம். நோய்களை நீக்க வல்ல காலோதக கூபம் என்ற கிணறு இங்கு உள்ளது.

தன்வந்தரேச்வரர் கோயில்:  மேற்கூறிய ம்ருத்யுஞ்ஜேச்வரருக்கு அருகிலுள்ள மாலதீச்வரர் பக்கத்தில் தேவ வைத்தியரான தன்வந்திரி பூஜித்த சிவலிங்கம் உள்ளது. அனைத்து நோய்களையும் நீக்க வல்ல சன்னதி இது. பல மூலிகைகளை இங்குள்ள கிணற்றில் தன்வந்திரி போட்டுள்ளதாகக் காசிக் காண்டம் கூறுகிறது. இக்கிணறு தற்போது காலோதக தீர்த்தத்துடன் கலந்து விட்டதாகக் கூறுகின்றனர்.

ஹஸ்தி பாலேச்வரர் கோயில்: மேற்கூறிய தக்ஷேச்வரருக்கு அருகில் தாரா நகரில் உள்ளது. யானையாக வழிபடப்படுவதால் இப்பெயர் வந்தது.

மாலதீச்வரர் கோயில்: மேற்கூறிய ஹஸ்தி பாலேச்வரரருகில் மாலதீச்வரர் உள்ளார்.

த்வாரேச்வரர் கோயில்: துர்கா தேவி கோவிலின் தெற்கு வாயிலில் துர்க் விநாயகர் அருகில் த்வாரேச்வரி  தேவியுடன் த்வாரேச்வரர் தரிசனம் தருகின்றார்.

கௌதமேச்வரர் கோயில்: காசி நரேஷ் சிவாலயா என்று அழைக்கப்படும் இக்கோயில், கோடோவ்லியா என்ற இடத்தில் மார்வாரி ஹாஸ்பிடல் அருகில் உள்ளது. முசுகுந்தேச்வரருக்கு அருகிலுள்ள இம்மூர்த்தியைக் கௌதம முனிவர் பிரதிஷ்டை செய்ததாகக் கூறுவர்.

கோப்ரக்ஷேச்வரர் கோயில்:  லால் காட் பகுதியில் கௌரிசங்கர் எனப்படும் இக்கோயில் , பிர்லா சம்ஸ்க்ருத வித்யாலயாவுக்கு அருகே உள்ளது. இதற்குப் பக்கத்தில் ஆதி மகாதேவர் கோயில் உள்ளது.

ஜ்வரஹரேச்வரர் கோயில் :  கோப்ரக்ஷேச்வரர் கோயிலுக்குக் கிழக்கில் ஸ்கந்த மாதா கோயில் செல்லும் வழியில் ஜயத்புரா என்ற இடத்தில் இருக்கிறது. கொடிய நோய்களால் பாதிக்கப்பட்டவர்கள் இங்கு வழிபட்டு நலம் பெறுகின்றனர்.

ஜம்புகேச்வரர் ஆலயம்: லோஹாட்டியா சென்று அங்கிருந்து, பாரா கணேஷ் கோயில் வளாகத்திற்குச்  சென்றால் ஆலயத்தை அடையலாம்.

ஜனகேச்வரர் கோயில்: தாரா நகரில் ம்ருத்யுஞ் மகாதேவ் பகுதியில் உள்ளது. அருகில் மாலதீச்வரரையும் தரிசிக்கலாம். நோய் நீக்கம் அளிக்கவல்ல காலோதக கூபம் என்ற கிணறு இங்கு உள்ளது.

கச்சேச்வரர் கோயில்: காலிகா கல்லியிலுள்ள சுக்ரேச்வர் அருகில் இருக்கிறது.இதனை  அடுத்து, விச்வநாதர்- அன்னபூரணி கல்லி உள்ளது.  அருகில் சுக்ர கூபம் என்ற கிணறு உள்ளது.

கஹோலேச்வரர் கோயில்: காமச்சாவில் படுக் பைரவர் கோயிலில் ஆதி பைரவரைக் காணும் முன்னர் கஹோலேச்வரரைத் தரிசிக்கலாம்.

காலேச்வரர் கோயில்: பைரோநாத்திலிருந்து தண்டபாணி போகும் வழியில் உள்ளது. பஞ்சகங்கா கட்டம் வழியாகவும் செல்லலாம்.

கர்தமேச்வரர் கோயில்: லோலார்க் பகுதியில் மகிஷாசுர மர்த்தனி கோயில் வளாகத்தில் உள்ளது.

கரவீரேச்வரர் கோயில்: லக்ஷா வரை சென்று மகாலட்சுமி சக்தி பீடத்தை அடைந்தால் அங்குள்ள மகாலக்ஷ்மீச்வரருக்கு அருகில் கரவீரேச்வரரைத் தரிசிக்கலாம்.

 மகாலக்ஷ்மீச்வரர் கோயில்: லக்ஸா வழியாகச்  சென்று, ஸோராஹியா  மகாதேவ் எனப்படும் மகாலக்ஷ்மீச்வரது கோயிலை அடையலாம். அருகில் மகாலக்ஷ்மி குண்டம் உள்ளது.

மதாலகேச்வரர் கோயில்: விச்வநாதர் கோயிலருகிலுள்ள காலிகா கல்லி என்ற இடத்தில் சுக்ரேச்வரருக்குக் கிழக்கே பஞ்சம் மந்த்ரேச்வரர் எனப்படும் மதாலகேச்வரர் கோயில் உள்ளது.    

மஹாஸித்தேச்வரர் கோயில்: அஸி பகுதியில் கோயங்கா காலேஜ் என்ற இடத்தில் இக்கோயில் இருக்கிறது. அருகில் ஸித்த குண்டம் உள்ளது. ஸித்தி தரவல்ல சன்னதி இது. அருகில் ஸித்த கூபம் என்ற கிணறு உள்ளது.

ம்ருத்யுஜ்யேச்வரர் கோயில்: பிசேச்வர் கஞ்ச் தாண்டி, வ்ருத்தகால் பகுதியில் காலேச்வரருக்கு அருகில் உள்ளது. நோய் தீர்க்கும் காலோதக கூபம் என்ற கிணறு அருகில் உள்ளது. இவரை அபம்ருத்யு ஹரேச்வரர் என்கிறது காசி காண்டம்.ம்ருத்யுஞ் மகாதேவ் கோயில் என்றும்  கூறுவர்.

   ( காசியின் சிவலிங்க தரிசனங்களும் பெருமைகளும்  தொடரும் )